نشرنا في عدد الأسبوع الماضي لغزاً كتبه الشاعر فهد الجروان يقول فيه: يا ويش عود عنيد وجاير في ديرته ما يهاب له سلطة يا رجال العرف كل يحسب حسابها يرسل لك جيوشه ما يفرق بين شيب وشباب واليا انتحى حاف له بنتين لين ينوخ ركابها وجاءت الحلول الصحيحة كما يلي: حيا الله اللي على سلم المراجل ما تونى وغاب يوم الوفاء وقفته بالماقف المشهود يدرى بها واللي شكا بالهوى هجر الحبايب لو تعنى وخاب النوم تسري به الاطياف مع روحه ويسرى بها ماجد الغزي الزلفي *** يا مرحبا عد ما نشت مزون السحاب باللي كتب لغز للقراي واشجى بها النوم هو حل لغزك يا عزيز الجناب لا حاف عينيك ما تقدر تقدى بها عبدالله صويان العرجاني الأفلاج *** يا مرحبا عد ما ينشي من المنشا صدوق السحاب يا شاعر لك ثمينات المعاني تلوى ارقابها يا عل عينك تهنى بالرقاد ولا يجيها ارتياب وتقر طول الحياة الهانية في شوفة أصحابها زايد الغزي الزلفي *** سلام وسمي بروقه نورها يلمع بغر السحاب يصب في ديرة الزلفي وتصبح خضرة اعشابها الفرق واضح وضوح الشمس ما بين الرخم والعقاب والحية ان جات تقرص فالحديد يكسر أنيابها والرجل لا صار في جواه حقد وملعنه والتهاب ودي يحوفه نعاس الموت وعيونه عمى صابها صالح سفر العمري *** أهلا وسهلاً ما لاح براق في جبين السحاب ترحيبة تشرح الخاطر وتفتح للقلوب النظاف ابوابها اتقدر اجهودكم يا اهل الوفا عن بالنا ماتغاب غنى حمام الفرح فوق الجزيرة والسعادة تفوح أطيابها تستاهل الطيب والفنجال وابشر يا فهد جبت لك علم صواب ما والله النوم يقرب من عيوني لين تقرى النجوم كتابها الزلفاوي الزلفي *** حييت يا صاحبي عد النجوم وعد وبل السحاب يا الشاعر اللي به بيوت القصيدة تفخران جابها يا كاتب اللغز حنا عندنا للغز حل صواب يا شاعر تعرف بيوت القصيد وتعرف اعرابها النوم سلطان تخضع له يا ابو سلطان كل الرقاب له لذة يا رفيقي والحظيظ اللي تهنى بها عطا الله بن سليمان العطاالله الزلفي *** يا مرحبا يا هلا عد الحصى واعداد وبل السحاب بالغالي اللي تنومني طروقه لا تغنى بها لغز سكبته لقينا الحل ما دونه ظلام وضباب النوم يا صاحبي سلطان لعيونك ولا هابها محمد بن حمد البدر الزلفي *** عطر الحقيقة يفوح بكلمة العاقل وهيل الصواب يا مزن الابداع تمطر والسعادة شرعت بابها قطرة ندى صافية تنزل على خد الزهر بانسياب مثل العسل حاليه لا والله أحلى منه وش جابها الوافي اللي عن الواجب تشوفه حاضر ما يغاب له سيرة كل ما هب النسيم تفوح باطيابها عن واجبك ما نظر للنوم جفنك يا فهد واستجاب والنوم رحمه من الخالق على خلقه تهنى بها محمد عبدالكريم الغزي الزلفي *** قريت لغزك يا بن جروان ثم ظنيت ماله جواب يا كود عند القلوب اللي تعاف النوم من مابها اللي فقد شخص غالي ما يبي للنوم والا شراب وعين تحارب لذيذ النوم تبغى شوفت احبابها سالم زياد الشلاحي المطيري بريدة *** ولك الثنا وارفع أسمى آية العرفان قبل الجواب وأنوب عن جملة الشعار وأنقل نظرة اعجابها يا ابو حمد زادت اسهم صفحتك في بورصات الحساب واليوم حلت محل اللي تنومس كل خطابها هذي شعوري وأنا في حزة الواجب اعرف الصواب غنيت يا أبو حمد من نشوة الفرحة وهندابها ومن عقب ذكر الثنا عطف على باب الجزاء والثواب يا عيني اللي على نوم العرب تشكي من اصحابها فهد بن محمد الغزي الرياض *** يا مجمل اللغز هذا اليوم في معناه جبت الصواب اجابته,, يا فهد,, سهله,, بسيطة ما بلشنا بها بيني وبين الكرى,, ياما جرى من مشكلات وحراب واليوم,, للنوم عيني يا فهد يا سرع ماجابها زهران عون الله المطيري بريدة *** النوم هو حل لغزك يا فهد ان كان ظني صواب اليا انتحى غربل العينين لين يطبق اهدابها منصور عبدالله منصور المجيدل الرس *** عرفت انا العود يا الجروان وابشر من يجيب الجواب هذا هو النوم له سلطه وكل يحسب حسابها واعرف ترى المبتلى واللي عليه من الزمان انقلاب ترى عيونه تعاف النوم من بلواه واسبابها عبدالله بن سعود الدغيثر ضرماء *** يا مرحبا يا فهد ترحيب احلى من مزون السحاب اعداد ما هلت الامزان فوق الضلع واهضابها ان كان تنشد ترانا عندنا للغز حل صواب النوم سلطان للعينين يا الجروان واهدابها سعود بن صالح الدغيثر
