شعر/ عيد بن عويد العنزي

تلقى الزبيدي مودعٍ له مداحيل

كريم يا برق بدى تالي الليل
من فوق هاك الفياض شفته يضوحي
يا برق ما أضنك مثل برق بخيل
الهقوه إنك ما يجي بك شحوحي
جعلك ترش سهولها بالهماليل
وتسيل الوديان حتى السطوحي
ونشاهد الشعبان تمشي من السيل
ومن بعدها الغدران تطفح طفوحي
ثم ربعت كل أرضها ما بها محيل
وطيورها قامت تغرد فروحي
غدابها المديد وقت الهوايميل
وريح البختري من أطرافه يفوحي
تلقى الزبيدي مودعٍ له مداحيل
من فوق سطح الأرض واضح وضوحي
وتشاهد الغزلان جضاً مجافيل
تقودهن عنود وجهه صبوحي
وقطعت حباري وسط فيضه مفاليل
حذرات من هدات طيرٍ ذبوحي
إديارنا يا علها دايم تسيل
أرضٍ قضينا به سنين فلوحي
هيضتني يابرق يا مايلٍ حيل
تشبه لخد اللي لحبه شفوحي
الجادل اللي ما هقى لغيري تميل
ولغير عيد أسرارها ما تبوحي
حلفت ما يسكن بقلبي من الجيل
من بعد حب اللي فراقه جروحي
يا برق وش عندك فرحت بهماليل
وانا الوحيد اللي خلاوي بروحي
ذكرتني يومي سليت بتعاليل
وخليتني بعد السعاده النوحي
أسامر النجمات وقضي هاك الليل
بس الحمامه جاوبتني بنوحي
يا برق تكفى خذ مني مراسيل