أسامر النجمات

كريم يابرقٍ بدا تالي الليل
من فوق هاك أفياض شفته يلوحي
يابرق ما أضنك مثل برقٍ بخيل
الهقوه أنك مايجي بك شحوحي
جعلك ترش سهولها بالهماليل
وتسيل الوديان حتى السطوحي
ونشاهد الشعبان يجري بها السيل
ومن بعدها الغدران تركد طفوحي
ثم ربعت كل ارضها مابها محيل
وطيورها طارت تغرد فروحي
غدا بها المديد وقت الهوا يميل
وريح البختري من أطرافه يفوحي
تلقا الزبيدي مودعن له مداحيل
من فوق سطح الارض واضح وضوحي
وتشاهد الغزلان جضن مجافيل
تقودهن عانود وجهه صبوحي
وقطعت حباري وسط فيضه مفاليل
حذرات من هدات طيرٍ ذبوحي
ديارنا ياعلها دايم تسيل
أرضِ قضينا به سنينِ فلوحي
هيضتني يابرق يامايلِ حيل
تشبه لخد اللي لحبه شفوحي
الجادل اللي ماهقى لغيري تميل
والغير عيد أسرارها ماتبوحي
حلفت مايسكن بقلبي من الجيل
من بعد حب اللي فراقه جروحي
يابرق وش علمك فرحت بهماليل
وأجبرتني أبدي بالابيات بوحي
ذكرتني يومي سليت بتعاليل
وخليتني بعد السعاده أنوحي
أسامرالنجمات وأقضي هاك الليل
بس الحمامه جاوبتني بنوحي
يابرق تكفى خذ مني مراسيل
وأودعك على أمل لي تلوحي