نبض الوداع

قصيدة رثاء في فقيد رحل عنا قبل أن يرانا,.
بديت باسم اللي ومرنا ودعيناه
وكل العباد توجه الوجه يمه
يارب ما غيرك الشي طلبناه
الطف بعبد زود الحزن همه
اليا صدر حكمك علينا رضيناه
نرضى بحكمك لا حشا ما نذمه
حبيبنا اللي بعد خمس انتظرناه
وقبل نضمه موحش القبر ضمه
ياما انتظرنا ضحكته والمناغاه
واللا بعد لاقال: ببه وممه
وياما انتظرنا لاعدا واحتضناه
ولبس ثويب يعجبك زين كمه
راحت امانينا وحلم حلمناه
وعروقنا من همنا مستسمه
حاولت اسلي خاطري يمكن انساه
لكن عيوني سحبها مدلهمه
ما انسى أبد دقات قلب سمعناه
توالفت مع نبض قلبي ودمه
ووشلون ابا انسى صورته يوم شفناه
عبر الأشعة قبل يرحل عن امه
ووشلون ابا انسى شكل وجه غسلناه
فالمغسله يوم اكمل الغسل عمه
يوم ابتدينا انكفنه شلت يمناه
حبيتها والطيب منها نشمه
ومن غير لشعر هل دمعي وقلت: آه
ولمحت في وجهه رساله مهمه
كنه يقول اصبر ترى الصبر منجاه
والصابر اجره عند ربي يتمه
ويابوي ابا حذرك عن قول ويلاه
عسى الولي يكشف عن القلب غمه
قلت الحشا يابوك بانت خفاياه
وقلب تحطم وانتثر كيف المه
لكن عساك ابرك شفيع بذلناه
فالآخره لبوه يشفع ولمه
وصلاة ربي عد حرف كتبناه
على نبي فرج الله همه