الموت حق

ناصر بكى والدمع ماهوب كافيه
وكثر البكى ما رد غالي لغالي
سر يا قلم في صافي الطلح وارثيه
ارثى عزيز صاطياً في خيالي
صالح.. رحل عني وقلبي سطى فيه
حزن براه الوجد وعز تالي
دنيا بها فجعات والموت باديه
الموت كدر صافيات الزلالي
الموت حق وكلٍ الموت لاقيه
محد يخلد لو تطول الليالي
بس العزيز يعز موته لغاليه
حزنه يطول بطول سود الليالي
وانا حزنت وحزن قلبي مطاويه
ماهوب عني منجلي بالسهالي
فقدت اخوي وضحكته بين اشافيه
اخوي ما مثله يجي من يوالي
أشفق من الوالد علينا مهاجيه
وأطوع من أصغر واحد من عيالي
ان جيت باللازم سريع القضا فيه
وان شاف في وجهي زعل شاف حالي
لو طالت الايام ماني بناسيه
ما ينسيّ زوله وذاك القبالي
حي ولو هو ميت في قلب غاليه
ابكي عليه بصافيات الزلالي
يا الله تخفف عنه ما كان جانيه
وتغفر ذنوبه عنه في كل حالي