دامك بخير وعنك للشر تجنيب ... حنّا بخير.. الله يمد بحياتك

من باب حب الناس لمعانق الطيب
تعلّقت ذاتي على كف ذاتك
الله وهب لي حسن منطق وأساليب
وأنت الملك.. ماهيب تحصى هباتك
حنا بلا منة علينا مواجيب
يا اللي صفاتك تكتمل من صفاتك
من دون ما تطلب ومن غير تأنيب
علّم ضميرك.. لا يعكر مباتك
وأمرك مطاع وكل ما قلته امصيب
لو كان في مدحك نخالف وصاتك
لاغبت تتعبنا المسافات ونغيب
وان جيت سالم عدها مكرماتك
دامك ابخير وعنك للشر تجنيب
حنا بخير.. الله يمد بحياتك
ماهوب ظنِ يصدق احيان ويخيب
شعبك على الواقع عيالك / بناتك
من كثر فرحتنا بشوفك بلا ريب
واقف على حيلك بليا عصاتك
تناثرت في قلوبنا لك تراحيب
تجمع تفاصيل الكرم من شتاتك
ياللي يديك اطوال من دون تخريب
تمتد في كل اتجاه لجهاتك
تزيح عن وجه الحياه العذاريب
واقسى تعبنا ما يزحزح ثباتك
لو مولد الحكمة يجي من تجاريب
ولادة الحكمة تجي من سكاتك
ولولا شعور الخوف من عالم الغيب
لاقول ما به حيّ سوّى سواتك
الشاعر/ مشاعر نجد