جارات بيتي حسبةٍ من خواتي

عرف النشاما هوايتي في حياتي
وما نبني العرفة على شان مصلوح
لعيالي اكتب ياخواني وصاتي
من قبل أنا ما أودع الكل واروح
رصيد ما عندي بروحي غناتي
وأجلي ورزقي ثابتاتٍ على اللوح
وودي برقعة مشلحي من عباتي
لكن بعض رقعها تتعب الروح
وأحيان أسهي بالسجود بصلاتي
من كثر ما بالقلب من هم وجروح
وأحيان أفضل عن كلامي سكاتي
ان صار بالمجلس حزازه وذرنوح
النفع في دنياي ما هو بمماتي
ياللي بساعة لازمي صرت مشفوح
أمشي مع العالم وعيني مراتي
وحلفت عن مرافقة كل مريوح
والجار ما رفعت صوبه قناتي
وان كان اخطأ قلت يا جار مسموح
وجارات بيتي حسبةٍ من خواتي
والشاهد اللي بقدرته ينفخ الروح
هذي هواتي ثم هذي صفاتي
ومع النشاما لي سجلات وصروح