كتم المشاعر

تعذب الإنسان لامن كبتها
واليوم بكتبها على وجه قرطاس
مشاعرٍ في داخلي دربكتها
مثايلٍ أحلى من الذوب فالكاس
تجوز لأهل الذوق لامن قرتها
يابو فهد قل الوفاء اليوم بالناس
وأشوف قلت ها الزمان ابركتها
والوضع مزعجني وأنا إنسان حساس
بعض العرب محتار وش سالفتها
وأنا أعرف العالم لها أصناف وأجناس
وما كل من جتها الجميلة جزتها
مير المواقف بعضها يوجع الراس
حتى النفوس الهادية نرفزتها
وأنا أحمد الباري بعيدٍ عن الياس
لو ضاقت الايام نرجي سعتها
ماني سوات اللي اتصفق وتحتاس
وتقعد على الأطلال تبكي بختها
ومحبةٍ في الله عزن ونوماس
تنفعك فوق الأرض ولا تحتها
وصداقةٍ ما هيب تبنى على ساس
يابو فهد يا شين طعم اثمرتها
قلته وأنا قلبي غدا فيه هوجاس
في حاجةٍ ما شخصت مشكلتها
لا شك أنا ببعد عن دروب الأدناس
وما نيب قارب حيةٍ وشجرتها
واللي تردا ما لها كود الافلاس
واللي تطيب علومها عينتها
مساعد بن علي القريني