قالت

أفداك يا صوتٍ رقيقٍ سريتك
تراك لو تِزْعِلْني أدوّر رضاك
يا خطوة المشتاق انا كم مشيتك
أنا مع العالم تراني بقاياك
لا تبيعني وانا بهم قد شريتك
مع توأمك يا كم سهرت أتحرّاك
البَدْر يشبه لك ومعه احتريتك
ولانك شبيهٍ للبَدِر ضعت واياك
ما تشوفني لامن سهرتك غفيتك!!
وأضيّعك وارجع وادوّرك والقاك
متربعٍ في القلب والبيت بيتك
يا كم كتبتك شعر، واعوّد اقراك
وارجع وأزوّد، واحفظك لا قريتك
كن القصايد ما تبي غير لاماك
تِثْبِتْك للعالم وانا ما نفيتك
والمسألة بالمختصر كلها عْفاك
أنا شربتك في الهوى وارتويتك
محمد باني السبيعي