عسى مقره بالجنان الظليلة

هذه قصيدة رثاء بفقيدنا المرحوم باذن الله فضيلة الشيخ حمود بن عبد العزيز السبيل قاضي التمييز ورئيس محاكم الخرج سابقا وعميد اسرة السبيل..
يا عيوني ابكن وانثرن فوق الاوجان
دمع كما هطال وبل المخيله
هلن وخوذن دم من كل شريان
على الفقيد العم شيخ القبيله
راح بثلاثين اثنعش موعده حان
والكل له ميعاد لازم يجي له
ياالله عسى له مع هل الخلد مسكان
عسى مقره بالجنان الظليله
عساه يربح يوم زوغات الاذهان
ويحسن عزانا ربنا في رحيله
دنيا الفنا واللي بها زايل فان
والموت حق ولالنا فيه حيله
وحنا اهل فطرة واهل يقين وايمان
لو حزننا ثقيل نزري نشيله
راضين في ما قدر الله وما كان
العمر كل العمر يوم وليله
يبكنه الرمل ويبكيه يتمان
ويبكيه مديون سجين كفيله
ويبكيه من للعُود له حط دكان
ويبكي عليه اللي يحب الفضيله
ويبكيه راعي طيب للطيب شفقان
ويبكيه بيت عامره بتهليله
ويبكيه كل اللي لمسكنه جيران
ويبكي غليل جاه وابرد غليله
ويبكيه راعي شان قضى له الشان
واللي الى ضاقت عليه يعني له
يا ما مسح عن قصر دموع الاحزان
كريم سبلا يده ماهي بخيله
بالجود جوده جاد ماهو منان
والى عطى يعطي العطايا الجزيله
كل الخصال الطيبه في كحيلان
حلحيل شيال الحمول الثقيله
راعي هلا وجهه بشوش بليهان
هو راعي الفزعة وراع الجميله
من جا يبي علمه رجع منه رويان
الله جمع فيه الصفات النبيله
شيخ حكم بالعدل للحق ميزان
ومسعاه باصلاح القبيل وقبيله
شيخ الورع والزهد ومحب الاحسان
تقصر يدين الغير ويده طويله
يبقى الى ناموا هل النوم سهران
الليل يقضيه بصلاة النفيله
والله لا ما مات ابوكم يالاخوان
عمي ترك سيرة نقية جميله
عمي ما مات انتم بعده اربع اركان
نوادر من نادرات الفصيله