وش فاد الونين

محمد الدوسري اسم قدم منذ فترة الى ساحة الادب الشعبي عبر الجزيرة,, قدم من خلال مشواره القصير مايجعلنا نقول لكم واثقون,, انتظروا جديد الدوسري الاكثر جمالاً في اعدادنا القادمة.
لاتسائلني عن الحال الحزين
عادة الاغراب تخفي حالها
إن شكينا مالقينا من يعين
وإن سكتنا نار زاد اشعالها
كاتم الاحوال مع مر السنين
والعباير في الحشا منزالها
في الكنين اضمها وسط الكنين
وابتسم لناس خوف انذالها
والونين إن فاد وش فاد الونين
غير عبرات تهز جبالها
حظي المبروك عيا لايزين
وثقتني بالهموم حبالها
نظرة الاصحاب ليه بالحنين
عودت نفسي على غربالها
خلنا نطرق معك طرق الرهين
والقصايد تشتكي موالها
هو هواك اللي قسى ولا السنين
مابقى لي حيلة واحتالها
كلنا وسط المشقة تايهين
قالها قلبي وجرحي قالها
والسعادة وينها والحظ وين
دام سحب الحب راح خيالها