دمع القصيد

الحزن وغياب الفرح.. عقدة العيب
والدمع والذكرى وهالحظ لامال
جيت أنزف الأبيات لعله يطيب
حرفي والاقي للفرح فيّ مدهال
الفقد يرمي طعنته ثمٍ يغيب
وأنا عشانه اسهر الليل واحتال
بالكحل وأحمر شفتي وانثر الطيب
ألبس على جيدي من الوجد سلسال
يزهاني الفستان والحاسد يخيب
ومدور الزلة تهدّم به آمال
أخبي بلون الوله لمعة الشيب
عشرين عمري يا هنا الروح لا زال
لكن لأنك مبتعد ما انته قْريب
ثار بكياني من عنا الوقت زلزال
كنت أتماسك وأنكسر للمكاتيب
أنزف قهر والحرف متوجد وسال
دمع القصيد اللي تعلّا المراقيب
وأَبْكَى بحزن الفقد يا صَاح رجال
أخطي على خد الورق وارجع أصيب
أشطب شطر وأكتب شطر واشرح الحال
وارجع أخبي داخلي عقدة العيب
وألبس قناعي وابتسم واربط الشال
أرقص على صوت الفرح والتراحيب
وأدفن مع الأوراق طعنات الأنذال
وانسى واعيش وأبني الروح وأطيب
واضحك ليا من هدهم صوت خلخال