مرّت

مرت مثل كلمة على لسان ثرثار
ومثل الوصية في الخيال استقرت
عن وصفها مانيب ناشد ومحتار
ما كنها إلا في عيوني تمرَّت
الله عليها كلها " طب واختار
"أخت القمر يا كم من الغيد حرَّت
مكثر ضحاياها ومع سبق الإصرار
يدينها سلهامها لو تبرَّت
تبسمت والثلج بادي من النار
واستوحشت من ردِّي وما تحرَّت
ماتدري إني يوم حديت الأنظار
خايف يميع الثلج لو استمرَّت
عيونها أول وآخر حدود الإبهار
أهدابها للحرب كرَّت وفرت
من وسعها ما تنظر يمين ويسار
ذبلانةٍ كم سرت وكم ضرَّت
وحجابها ما صد شلال الأنوار
هذا وهي متحجبة ما تعرَّت
ما أقول لك زهرة ولا كل الأزهار
أقول بستانٍ به العين قرَّت
مرت وأنا مريت في حكم الأقدار
ياليتها من قبل ما أمر مرَّت