هواجس

شعر- الوجد
يارب وأنت اللي عن الغيب تعلم
ياللي لغيرك ما تفيد الشكّاوي
أفرج على قلب لا جاء الليل واظلم
تلفي همومه من جميع النّحاوي
قلب على صلف المواجع تأقلم
ما يهتني دايم حزين و شقاوي
ما غير يتمنى السعاده ويحلم
ويا عنك ما تنفع كثير المناوي
همّي بنا له داخل القلب معلم
وذيب الهواجس بالمعاليق عاوي
ما فيه يوم من التفاكير يسلم
وعلى جميل الصّبر ماهوب قاوي
غدى من الهوجاس موحش ومظلم
وزادت همومه و المحن و البلاوي