بدايات صمت

ابتدت ساعة الرمل تعلن..
عن بدايات صمت.
وابتديت أفهم إني..
عاشق للسكوت..
...ومغرم بالقنوت
وكم وياما على فعلي تندمت.
فينيّ الضعف..
لكن آه لو شفت ضعفي
وش يسوي إلى منّه نكزني.. وعزّمت.
تنقلب صورة التاريخ لحظة..
وارتكي فوق عزة روح وأنسى..
وش خذيت، وتعلمت..!
أول الليل نمته..
وآخر الليل صحيته على نور شمسي.
ومن عرفت التناجي..
قل همسي..
وصرت أشوف الفجر..
لا جيت، يفرد عباته..
ويتوارى إذا نمت!
يارفيقي على هالدرب عطني يدينك..
لوعماك العجاج..
وضعت بيني وبينك..
أو تألمت.
ابتدت ساعة الرمل تعلن..
عن بدايات صمت.