جرايم حريمنا (1 2)

ادري لا قلت حريمنا تحرك في روسكم علوم القبايل والفزعات والنخوات، ايه حريم، واي بنت سعودية هي من بناتنا ومحارمها محارمنا، هذولي من لحمنا ودمنا، حسيت ان خنقتني العبرة، ليت المكتب الحين فاضي، ودي امحط راسي بالطاولة وانحب وانوح لين يطيح اللي براسي، مشكلة رهافة القلب، ما تقدر تفتك منها يالواحد، وهذي النوعية انصحهم ما يتابعون الاخبار، ودايم لازم مناديلهم بجيوبهم، بالله افرض جتك العبرة ولا معك مناديل كيف تصرف السالفة، خصوصا اننا ربعنا ملاقيف لا طلبته منديل قال لك: سلامات عسى ما انت مزكوم، عاد مشكلة لا قلت له ايه مزكوم يظل طول الدوام كاش منك خايف تعديه، ويقوم عاد يستلمك نصايح انك لازم تستاذن تروح للطبيب، وهات يا فلسفة، رح يا اخي للطبيب والله عشانك اعرف واحد تساهل بالزكمة واغمى عليه ومات دماغيا، يخوفك باللي هي به يبي الفكه منك، نرجع لموضوعنا «ياحبك للهذرة الفاضية»، تقول دراسة مدري شلون قايلة، ان الجرايم الاخلاقية هي رقم واحد ترتكبها حريمنا، عاد انتم تعرفون مجتمعنا وتعرفون ان البنت لو لقاها اخوها عند الباب ما نزلت من الحافلة زين تسلمها تكفيخ ودق على ابوه، وتلاقي هالاخو سربوت يشوف الناس بعين طبعه، ثم خم الجوال وسوى فيلم طويل عريض، والباقي يجي الابو ويكمله.
بكرى نكمل ... اوعوا تغيروا المحطة...