ضحايا «المزح»!

الكثير من الناس ما يعرف يمزح غير يستخدم ايديه، يعني تكون انت مفهي ومرتخي شوي والا جايك طراق على رقبتك، تقعد اكثر من دقيقة وانت تحاول تجمع خلايا مخك، بعض الناس بايعها، ممكن يسوي فيك جريمة فادحة وياويلك لو تضايقت، على طول ينقلب عليك ويحطك بلستة الزعولين، هذا كوم وفنانين المقالب كوم، بعضهم ما عنده مشكلة يفرق بينك وبين زوجتك او يخلي ابوك يطردك من البيت تحت اسم مزح، المزح لا تعدى اللسان يصير مصارعة حرة او نكبة بس ما يسمى مزح، اذكر كان فيه واحد جاي طاير بسيارته يبي يمزح مع صديقه اللي كان واقف بالشارع، المهم جاي طاير ناصيه، والمسكين ما يدري وين يروح، لف يمين ومن الخرعة الولد لف معاه يمين، والنكبة ترى يا اخوان لا جت ما تاخذ الا ثواني، يعني ما يمديك تتلافها او تخفف منها، المهم السيارة طيرت الولد في الشارع اكثر من خمس امتار، ويشيله خويه طيران للمستشفى وجلس شهرين على بال ما يصحى ويعرف اللي حواليه، وصديقه كل ليلة يجلس بجنبه ينوح خايف انه يموت ثم يروح في سين وجيم، لا تحسب ان المزحة تيجي عواقبها زي ما تبي، بعض الناس يمزح بالتصوير بجواله يحسب ان هاللقطة ما تنتشر وتصير على كل لسان، ويمكن تجيب لك بلاوي انت ما تدري وش عواقبها، اتركوا المزح وبالذات مزح اليدين والتصوير بالجوال والاسلحة، ترى لو تجيكم احصائيات عن نكبات هالنوع من المزح غير تحلفون ما تمزحون ابدا.