مدري وش نستفيد من أرقام الخدمات اللي حاطتها كثير من الجهات بزعم أنها لخدمتنا، وهي الحقيقة ما تقصر تخدمنا ولكن بعد ما ترفع ضغطنا وتعلنا وتجيب لنا أعراض مرض المناطق الحارة وهي الرغبة في (صفق) الراس بالجدار للخلاص من الألم والقهر، تتصل وأنت مستعجل تبي تلحق زوجتك الحامل بأقرب مستشفى ولو اتصلت على الدليل لا تلوم إلا نفسك؛ لأنك تحتاج ربع ساعة وأنت تسمع (عزيزي العميل اتصالك محور اهتمامنا، الرجاء الانتظار حتى نتمكن من خدمتك)، انتبه تصدق جملة: نتمكن من خدمتك؛ لأنك يمكن تصدقها عشانك توك متزوج جديد وساقك القدر تتصل لأول مرة ب905؛ لأنهم حتى لو تكرموا وردوا عليك وعطوك رقم سنترال المستشفى راح تضيع ساعتين وموظفين سنترال المستشفى ضامنين أن مديرهم لا يمكن يشيك بالاتصال عليهم وجالسين ينصحون بعض ويتبادلون الخبرات في أفضل العلاجات الشعبية ووين أفضل معالج شعبي، مشكلة المتزوج الجديد أنه مسكين يصدق بسرعة، يصدق إعلانات التخفيضات ويصدق إعلانات المستشفيات بالخدمة الأفضل وزيارة الاستشاري فلان، ويصدق أنه مواطن والكل يتمنى يخدمه، وبعد ما يخش عالم الزوجية ويحتاج بصدق يلاقي كل شي (فشوش)! فاصل إعلاني: عزيزي (الهبيل) اتصالك (آخر) اهتمامنا، الرجاء (الانثبار) حتى نتمكن من (تطفيشتك)!
