طبيعي 100 %

خلاص يا عمي لا تناقش، المنتج مكتوب عليه طبيعي 100 %، يعني انت تبي تصير احسن من كل هالخبراء والشركات اللي صنعت المنتج، وتجلس الله يصلحك تقلب لي في هالعلب فوق تحت، مرة تقرا المكونات ومرة تدور تاريخ الصلاحية ومرة تشوف اذا يبي لها رج قبل الاستعمال والا ما يحتاج!
هذي ناس عارفة شغلها يا حبيبي، المنتج طبيعي يعني طبيعي.. انت ما عليك الا تستهلكه في الوقت المحدد وتشتري أكبر كمية منه خصوصا إذا كان عليه عرض، وخلي عنك الكلام اللي تسمعه في حملات التوعية الصحية والغذائية لأن الأمور إن شاء لله ما عليها خلاف وإذا كان فيها شي ولاش اكيد بيعلمونك هيئة الغذاء والدواء، وإذا علموك متأخر بعد ما عليك الا العافية المهم انك دريت في الاخير!
يعني تبونا نفكر بهالطريقة يا تجارنا الأعزاء؟ انتم وبضايعكم اللي خذني جيتك هذي؟ الحين عصير مكتوب عليه طبيعي 100 % ومن زين الطبايع في نفس العلبة كاتبين المكونات ما فيها غير 5 % بس من الفاكهة والباقي ألوان ومواد حافظة ومركبات كيميائية، أتحداك انك درست واحد فيها أو شفته بالغلط في الجدول الدوري حق الكيميا ايام الثانوي.. لا واحلى شي لما يجيك بياع في بقالة يجلس ثلاثة شهور يبيع بسكوت باقي من صلاحيته شهر، والعالم ما عندها أي مشكلة يشترون ما دام بيعطيهم واحد ثاني بلاش!