رفقة ردي المعرفة

يامتعب الأقدام رايح على وين=مع جرّةٍ جاها العجاج ودفنها
ارجع وعدّ خطاك وحده وثنتين=واكبح جماح النفس وامسك رسنها
ولاتسبر الدنيا ترى وضعها شين=ماعاد به دنيا صحيح بدنها
لاصاروا العقّال مثل المجانين=واصبح ردي العرف يآمر وينهى
انا خذيت من التجارب براهين=اراهن الأيام واكسب رهنها
ومنها عرفت الفرق بين الفريقين=سبحان من صاغ العقول ووزنها
وان كان صح ان التجارب براهين=ضمنتها لن كان ربي ضمنها
رفقة ردي المعرفة بعتها دين=على زبونٍ ضمّها واحتضنها
بغى يجيني بالثمن قلت بعدين=امسك فلوسك لين ننشدك عنها
مابعتك الاّ سلعة يااحمر العين=ابيعها وابيع حتى ثمنها
والله مبي فيها الثمن لو قرشين=بس المهم اني تخلصت منها