طيف: نص شعري

تجيني طيف ..
وامرر بالهوا يدّي ..
أحاول امسكك لكن ..!
ابعرف .. كيف ؟
وانا بعدك .. وطن يبكي
جفوه الناس..
سكن فيه الخريف وكان يتساقط..
من أغصان الشجر .. حزن / وحنين / وياس !
وكان الناي / صوت الريح..
إذا غنّى..
يطيح الليل في حضن السما يجهش..
وتتهاوى النجوم تصيح ..!
واشوفك حلم من غبتي ..
واحس ان كل شي انتي..
وآخيلك في الظلام / الضي..
بدونك .. كل شي [ لا / شي ] !
ومن صارت جروحي شمس..
وانتي غايبه عنّي..
وانا .. ما عاد فيني فَي..!
كثر ما كانت أحزاني تغازلني وترضيني ..
إذا الأفراح بكّتني من الحرمان / تبكيني..
كثر ما أشعرك فيني..
وأعيشك في غيابك زيف..
ويلبسني الشتا معطف ..
وادوّر للدفا عنّك / بفصل الصيف !
( تجيني طيف )..
وامرر بالهوا يدّي..
أحاول ألمسك لكن..
ابعرف .. كيف ؟؟
الشاعر: نايف العمر