مبروك يا سيدي شايف معاك صك طويل عريض باين كده والله اعلم انك اشتريت كم قطعة ارض؟ اللهم اني صايم كم قطعة ارض، هوه في الزمن ده احد يقدر يشتري ارض، من جد عيون كبار للهوا والغبار، هدا برنت من المرور فيه مخالفات من عند العم ساهر. اووف الله يعينك يا سيدي بس عسى ما لسعووك بمبلغ محترم؟ يعني 1500 ريال بس، طيب يا سيدي سوق على مهلك وبلاشي من السرعة والتفحيط والجكر حقك؟ انا شكلي شكل تفحيط وسرعة وجكر انا امشي بالسيارة واقول يللا النوور وماني عارف كيف جات هادي المخالفات، يللا حلال عليهم ورمضان كريم، لكن المصيبة انه اتنين من القراء الاسبوع الماضي زعلو عليا ورشوني صح بكلامهم اللي يوجع زي القارئة ملكة جمال السمر اللي قالت لي، الله يسامحك يا سيدي تكلم حريم من ورايا؟ هيا خد علمو وحطو في قارووره يا حرمه افهمي هادي قارئة بتعلق على المقال في موقع الجريدة وبتقول «ساهر ساهر ساهر الطفل ما يتعلم من خطأه الا اذا حس بحرقه بقلبه وأنجح طريقة تعلم الطفل هو أي خطأ يصدر منه يخصم من ألعابه او شي يحبه وهذا المبدأ أخيرا فاد مع شبابنا السعوديين وأنا من المؤيدين الشاكرين له وأطالب ايضا بنظام منع الهاتف النقال اثناء السياقة حيث انه لا يستطيع الرد على المكالمة الا في حالة توقف السيارة نعم لساهر ونعم للتكنولوجيا في سبيل الحد من الارواح والحوارث حتى وان فلس مجتمع السعودية». الاخت ملكة جمال السمر بتقول كده عشان ما بتسوق سيارة ولا جاتها قسايم واللي يده في المويه مو زي اللي يده في النار. اما حبيبنا نعيم خياط بيقول بعد ما قال كلمتين حلوه في اسلوب كتابتي باللهجة الحجازية «استاذ فتحي، الاسلوب الحالمنتيشي فاكهة الطروحات في جريدة عكاظ، ولكني اجدك احيانا تحدف شمال كثير، مثل كلامك عن ساهر اليوم، هل ساهر سوف يصدر مخالفة لمن كان يسير بالسرعة المسموح بها؟ وهل وصلت المخالفات 20 ألف ريال لشخص متزن ومحافظ على ارواح الناس؟ ويحافظ على النظام؟ اذا الانسان ما يحترم نفسه ويحافظ على حياته وحياة الآخرين فإن من الافضل عدم السماح له بقيادة سيارة وجعله مثل النساء الممنوعين من قيادة سياراتهن»، كلام الاثنين صح يا سيدي ساهر خفف من الحوادث اللي بتصير في الشوارع، يا ستي ما قلنا حاجة ساهر على عيني وعلى راسي والنظام على عيني وعلى راسي بس مو بالشكل ده ساهر متخبي في الشوارع ووسط الاشجار ومحد داري عنه كأنه جالس يلعب مع الاوادم طييش، يا ناس يا هووه هادي اسمها والا بلاش لا نروح في خرخر، ايش فيها لما يكون في تحذير لأصحاب السيارات انه في جهاز ساهر على بعد 100 متر تقريبا مو احسن من شغل اللصلصة ده، وايش اللي يمنع انه يكون ساهر موجود بس في الخطوط الطويلة وبلاشي من الخطوط الداخلية، يا جماعة الخير ساهر محاولة لإعادة الضبط للشارع السعودي بس بالعقل مو بخراب البيوت، لا والمصيبة الكبيرة انه المخالفات بتدبل على اصحاب السيارات وشوفي عاد كل واحد يراجع المرور يطلع وفي يده صك 10 متر كله مخالفات، يا هوووه ياناااااس ترى الناس فيها اللي كافيها والرحمة حلوة وعيشوا كتييييير تشوفوا كتيييييير.
