كامل الأوصاف والعفة

يا حلو يا كامل الأوصاف والعفة
أكثر ما يخشونه أهلك غيرة إخوانك
جذبت سلك الخفوق وجاك من خفة
وكويت جرح قديم وقلت من شانك
بالزين والا الدلع ترجح بك الكفة
أخذت ثلثينها عن كامل أقرانك
أخذت من ورد خدك حمرة الشفة
وكحلت من لون شعرك ناعس اعيانك
من يوم فتحت عينك وانته مرفة
من اخمص اقدامك ليا هلال حجانك
معجبك يوم العرب خلفك تقل زفة
زود غرورك ما زادك شي فايمانك
وش ذنب الاجواد في غزة من الضفة
دلعتك العايلة واغواك شيطانك
الوقت لو زان لك كم راح في خفة
من شاعر مكسبه: صح الله لسانك
ولو كل واحد يجي وقته على شفة
أقول يا ليتني من ضمن جيرانك
استغفر الله لا يا كامل العفة
عساي ما أعرفك من شاني ومن شانك
عوض فرج