تمنيتك

تمنيتك تعاندني وتعاند سطوة النسيان
تمنيتك تعيد الحب وترسم داخلي بيتك
حسافه كان ما بقّى غرامي بداخلك وجدان
خلاص أغواك شيطانك وقال إني تحدّيتك
غلاتي حبي مو نزوة أبد يا بلسم الأحزان
أقول اليوم حبيتك وبعد أيام مليتك
وإذا اللي صدّ له حجّه يقول: إنه ترى زعلان
خسارة يضيع فينا العمر راضيتك وبكّيتك
أبيك تقول يا حبي ترى ما بيننا نكران
عشقتك وقت ما شفتك وربي جدّ حبيتك
أجيك كلي وأنا كلي فدى روحك يا أغلى إنسان
تنسيني همومٍ جت تناديني وناديتك
تعال اسقي شراييني وإروي ظاميٍ عطشان
حياتي الدنيا ما تسوى ورب البيت أنا أغليتك
تعمدت أخفي شوقي لك ووصّي قلبي عالكتمان
وإذا حبّيت حطّيتك وسط عيني وغطّيتك
نقشت اسمك على صدري وزادت لهفة الولهان
وبان الشوق في عيني وبالإحساس ضميتك
صحيح ان العتب وارد ولا يباعد ما بين خلاّن
وعسى الله لا يخلّيني إذا في يوم خليتك
الشاعر / محمد عبدالعزيز الراشد