غصن المشاعر

عهدي بورد الحب ساكن روحي
ومن المشاعر لاذبل يسقونه
ابني على نظم القصيد صروحي
من موق عيني لين شوف عيونه
جف الحبر وين الدوا لجروحي
وين الوطن يا الفكرة المجنونة
سطرت في صدر الغموض وضوحي
ماردني ظلم الليالي دونه
وأطلقت في مرسى الدفاتر بوحي
من عقد لولو والملا يجنونه
وأن ذاب شمعي فوق باقي لوحي
شقيت صدري علهم يقرونه
داخل خفوقي له معاني توحي
مثل الجواهر بالغلا مصيونة
هنا مواري غايتي وطموحي
وهناك قصري بالعطا يبنونه
يبقى بشرفاته صدى لمزوحي
تحيي مواعيد اللقا المسكونة
تنبت ورود الحب بك ياروحي
وغصن المشاعر لاذبل يسقونه
رنين الذهب