نحول

السهر طال وهموم الليالي تطول
ليت هم الليالي بالصبر ينجلي
والشعر والقوافي والسهر والنحول
كن قلبي على كثر الحزن مبتلي
ادري اني على بعض الخطاوي عجول
وادري ان الخطا باللي يصير جهلي
يورق الصمت واوراق السوالف ذبول
يا هجوس القوافي بالقصيد اقبلي
السوالف بعضها تستثير العقول
ويتبيَّن عليك العاقل من الخلي
ما حسبت الحكي والبهرجه والعذول
كنت خايف وجودي ما ينومس هلي
يا حمد والرجال اللي تهاب الحمول
قلَّها ما بَرَكْ دون الطموح جملي
والعدا لو تزوَّد بالحكي ما تنول
غير صمتٍ عليه قلوبها تصطلي
يا حمد وأنت مثلك ما يكافيه قول
لو جمعت المديح من اخري وأولي
مثلك من الرجال اللي تقول وتطول
نادر اللي تشوفه بالمواقف ملي
بالرخاوي سموح وبالصعايب صمول
ودون ما قول تعرف ضيقتي وزعلي
يا حمد كل هم وكل حزنٍ يزول
غير هم الطموح وهم مستقبلي