رياح الشوق

شكا غصن الحنين البعد ومفارق عصافيره
تصافق به رياح الشوق والهجران يلعبه
بدون أسباب تقنعنا غدينا نعيش في حيره
وقلبٍ ما يطيق فراق من يغليه ويحبه
كثر ما الشوق ذابحنا وكثر ما جابتك سيره
وكثر ما تفقدك عين وتهل الدمع وتصبه
كثر هجرك كثر بعدك يخون لساني تعبيره
صعيب الحال ما يوصف طواري هجرك السبه
ترى كسر القلوب اشكل على مداويه تجبيره
وجرح القلب لاصابه صعيب علاجه وطبه
قيود الشوق كبلته ولا جدوى لتحريره
رهينٍ للسهر جفنه لذيذ النوم ماطبه
شعور الهايم الولهان يصعب حيل تصويره
لهيب الشوق في صدره كأنه نار مشتبه
على درب الامل يصبر ولو طالت مشاويره
يسلي خاطره ماضيه واللي فات من حبه
اكيد ان الزمن لو طال تشرقلك تباشيره
ينسيك الهموم اللي بوسط القلب منصبه
وعسى حبل الوصل يرجع ولا يسرف فتقصيره
وقلب العاشق إن عاد الوصل هلا ورحبه