يضيق البوح

في صدري وكن في الحنجره ميقاف
تعبت حْروف في صوتي أحاول بس أجمّعها
يبحّ الصوت واغصه وانا الكتمان منه اخاف
يبلّ الكبد باشواقي .. وباحزاني يقطّعها
على كفّ اللقا في دون موعد والجروح اخفاف
جمعنا الله .. ورغباتي عظيم الحبّ يدفعها
تلاقينا بعد غيبه ونبض القلب بي ماراف
يزاحم جملة اضلاعي وسط جوفي يشرّعها
تصافحنا ولمسات اليدين مْن الوصال الجاف
تخلخل بعضها ما بين اصابعها.. بصابعها
خجلت وما عرفت احكي وبان بصمتي الشفاف
ملامح لهفتي .. واصوات بسكاتي أسمّعها
أتمتم واشهق احساسي من اعماقي شغف واجحاف
واضيْع بْكلمتي لاني .. مع انفاسي أطلّعها
ولو ناظر وسط عيني بيلقى شيّ له ما شاف
غلاه الماكن المكشوف.. والخافي بمدمعها
تلعثمت الألف .. والحا.. وحرف البا.. وحرف الكاف
تحشرج صوتي المبحوح احاول له أجمّعها