بيت وصدى

كان بيت الأسبوع الماضي للشاعر مشاري بن محسن الغربي من الرياض حول موضوع بر الوالدين واهميته ومدى توفيق الانسان حسب بره ويقول:
ما يشاف الرجل بالعين الوسيعه
لين يظهر رحمته ف أبوه وأمه
وكان صدى البيت من الشعراء:
أمر واضح بالشريعه لو نطيعه
كان ركن الدين وافي يوم تمه
نعبد الله ثم نحسن بالطبيعه
حبنا للوالدين احلى مهمه
يا عباد الله هبو في الوسيعه
اخضعوا للوالدين بكل همه
علي رشيد الرشيد - رياض الخبراء
امك احذر امك امك بالشريعه
ومن يقصر في رضاها له مطمه
ثم ابوك ارجوك ملزوم تطيعه
وان زهمك الأب خلك دوم يمه
فرصتك والعمر يصرم مع ربيعه
فرصة اللي باقين ابوه وامه
عبدالكريم ابن خزيم - البكيرية
الله اللي وامر وانا نطيعه
نكرم الوالد ونبعد عنه همه"
لا تقله اف تاقع بالقطيعة
حب خشمه ثم يده ثم ضمه"
ارحمه رحمه وسره لا تذيعه
حظ من يرخص لهم روحه ودمه"
عثمان ابراهيم الرشيد - الرياض
ما تهنى من عمل فهله قطيعة
نفس ماسويت يرجع لك تلمه
بنصب عينك حطهم لك فالطليعة
تحت رجليهم هوى الجنة تشمه
لبر ابوك اتعب على ما تستطيعه
وامك لها حقوق واللازم تتمه
سعود بن عبدالعزيز الهزاع - نعام
من يبي التوفيق والجنة يطيعه
خالق هالكون فارج كل غمه
واحد معبود ناهي عن قطيعه
يرحم المخلوق لاجات المطمه
ياولد بنصحك في وقفه سريعه
دام وقتك يسمح قيام المهمه
والدينك لو تبيع اللي تبيعه
ماتوازي جهدهم في كل همه
حمد عبدالله الوايلي - حوطة سدير
كم غلامن نضرته عليا رفيعه
غير شيبانه ترى ماشن يهمه
لاجلهم ما يملكه يرخص يبيعه
في رضاهم راقين في راس قمه
في رضاء شايبه يا مره ويطيعه
ما يقول العود من حقه يتمه
سعد صنهات السهلي - الدرعية
الوصيه فالقرآن وفالشريعه
وكل نبي بارٍ ببوه وامه
المنازل والدرجات الرفيعه
أُمنيه لكل فرد وكل أمه
ما تحقق بالعقوق وبلقطيعه
مَنْ يَعِقْ الويلٌ له يوم المطمه
عبداللطيف الحُمَيَّانِي - عنيزة
وهناك أصداء على اوزان اخرى غير بحر البيت المطروح:
للوالدين حقوق حذرا القطيعة
واللي قطعهم ضايع ما فيه ذمة
والدك له حق ولازم انك تطيعه
وأمك بوسط القلب لازم تضمه
أقرا كتاب الله مع علوم الشريعة
وتمعن الآيات بفكر وهمة
محمد عبدالعزيز الخنيفر - اشيقر
كم واحدٍ يعجبك منَّه صنيعه
يعطيك ما تبغاه لو كان دمَّه
وحاله مع أهله دوم هجر وقطيعه
ومع والدينه ما رعى حقِّ ذمه
الله أمر والأمر واجب تطيعه
أبوك وأمك قدرهم فوق قمه
ناصر بن جمعان آل عوض - وادي الدواسر
بيت الاسبوع
يكتبه اليوم الشاعر عبدالمحسن المحيسن من رياض الخبراء الذي يقول:
المنظر الخلاب يجذب هوى النفس
والخايع الممطور يبهج خضاره
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
كما يسرنا مشاركة القراء بموضوع البيت ومن الشعراء بطرح بيت الاسبوع حول اي موضوع