تقول أمي!

البحر: مجنون...! واللهجه: فظيعه
والموسيقى عاليه... والقاف «لول»
الحروف حتوف... والنبره سريعه
و «الغريبه» خلف «تسجيل الدخول»
يا الغريبه... غربة الشاعر شنيعه
لا غدى يقدر يطول... ولا ينول!!
النفوس اثقل من الأرض الوسيعه
والعقول أفرغ من جلود الطبول
الحداثه: شوهت وجه الطبيعه
والأصوليه: على غير الأصول
والثقافه: مارست دور الخديعه
والشعوب تدور بأنصاف الحلول
والصحافه: تشري الجهل وتبيعه
والكراسي: حايره بين الفحول
الردى ما هو جزا «رد» الصنيعه
لكن...! شلون آبفهّم ه«الخبول»؟!
حملوني فوق مالا استطيعه!!
لين صرت ل... أضعف كتوفي حمول!
ويش أقول؟!... و باقي الأشياء خليعه
بين ذولاك... وهذولاك... وهذول!
صدقيني... كل شاعر له هزيعه!
بس أنا رغم انتصاراتي... خجول
كل ما طاحت من عيوني مذيعه
قلت: وين القى مثل هاك... البتول؟!
قالت امي: لا عصاك الوقت... طيعه
قلت : وان ماطاع؟!... قالت: وش تقول؟!
بالك...! السرّ اللي بصدرك تذيعه
لو تناهشك النواظر بالفضول
كل واحد من عيالي له طبيعه
وانت من صغرك... على... كبرك عجول
والله اللي نّزل احكام الشريعه
لو تقول اللي تقول... أو ما تقول
لا تنكّر... كل متبوع لتبيعه
مايفوز اللي تبع غير «الرسول».
خالد الردادي