فعل البشر بالارض صارت شنيعة

ليت المواطن يعتني بالطبيعه
البر من فعل البشر صار ينعاف
فعل البشر بالارض صارت شنيعه
اللي قريب المدن واللي بالاطراف
نبته تغير لو يبكر ربيعه
صارت تغطيها النفايات بلحاف
هذا تراه مخالف(ن) للشريعه
من ديننا يكره ومن كل الاطياف
وتشوف وانت مع الخطوط السريعه
تشوف منهو للنفايات حذاف
اللي يلوث دارنا لاتطيعه
كثر القمايم جات من كثر الاسراف
شافوا قمايمهم وقالوا قطيعه
زود(ن) على كثر النفايات منساف
حافظ على دارك تراها وديعه
ورثك رب(ن) خالق(ن) كل الاصناف
حافظ على ديرتك لو هي وسيعه
حتى تسرك بالنظر يوم تنشاف
لا تتخذ كبر المساحه ذريعه
احفظ نفاياتك مع اكياس الاعلاف
خلك عصامي(ن) تجي بالطليعه
صديق للبيئه بلا جور وجحاف
حتى حطبها وفره لاتبيعه
قطع الشجر مكروه في كل الاعراف