نرجسي الصبابة

اشتقت لك شوق العصافير للنور
وحنيت لك حنّت حمامٍ ل غابه
جيتك ضيا شمعه والاحساس بلّور
عذب الحنان، ونرجسي الصبابه
لو ضاقت الاحلام عن عالم الحور
عندي عيونك في بحرها رحابه
بنيت لك قصرٍ عليك انت مقصور
اقبل وقلبي ينطحك عند بابه
وانا على دربك مع الورد منثور
اضيف للجوري شعور المهابه
اجبر حنيني يوم، واتعبني اشهور
رغبة خفوقٍ متعته في عذابه
العب بقلبي بين اياديك باكور
من هزة كفوفك تجدّد شبابه
جمرك على جرحي، وتنهيدة الجور
الطف من انفاس المطر والسحابه
وانسبني للحرمانٍ، اهاته احضور
وكل المواجع خلّها لي قرابه
ولابي تناظرني وخاطرك مكسور
(ابي تقول الحظ وشلون جابه )