صوت الصورة

يا دحيم أنا موتري خربان
هات العصا نرفع الكبوت
صارت تعثور مع الشكمان
قامت تقاطر شحم وزيوت
جبنا المهندس أبو حسان
ومهندسٍ لابسٍ له كوت
عبدالعزيز الصالح - القصب
بيجو تعطّل وقف خربان
مكينته تنضح أزيوته
وراعيه مَل أو تعب زعلان
متكرفسٍ وسط كبوته
غيْر العمل والمره ورعان
وهموم بالصدر مكبوته
فهد عقيل الطويان - بريدة
كم مرةٍ جاب الخطوط السريعه
بيجو مصنعته كفوف الفرنسي
كثر العطل ماهيب عنده طبيعه
ولولاه طوّل ومن الصيانات منسي
شغله تكانة بس اقفى ربيعه
وباقي شرايد صبغ بلون تكسي
سعود عبدالعزيز الهزاع - نعام
صورة العدد السابق
بالهون يا راعي البيجو
خل المكينه بعلتها
علاك باللي تطير الجو
النجم فخر لصناعتها
وأهل المواتر ليا سجو
في سرع طافت وخلتها
بدر عبيد العتيبي - عفيف
الموتر اللي من قديمٍ له سنين
ذاق المكدّه وانتهى طول عمره
من أولٍ يمشي ويدل العناوين
واليوم شايب وانتهى منه صبره
راعيه حاول بس ما يقدر الزين
عوّد يصلّح والخسارة بظهره
حمد عبدالله الوايلي - حوطة سدير
للحياة ظروف وأحوالٍ صعاب
تعلّم السواق بعض الهندسه
مايتراكا ويندب الحظ بعتاب
ويحتري من يجيه يصلحه
غير فيئه نادره من هالشباب
للقياده بس والشغل ما يلمسه
عبدالملك عبدالكريم - بريدة
أشوف البيجو بالخزامى مفتوح كبوته
والسايق بوسط المكينه يدوّر خرابه
متعطلٍ بالخلا ماحدٍ يسمع صوته
ويتلفت يمين وشمال يعاين أصحابه
مدعث عيد العبيدي - الرين
بيجو قديم ولوحته مالها شوف
متعطلٍ راعيه بوسط المدينه
مكينته خوفي تبي زيت وبلوف
وراعيه محتاراً عسى الله يعينه
خالد ناصر المخيمر - روضة سدير
ترى الغنا للرجل عز وكرامه
والفقر للرجال يخلف هقاويه
الناس تركب من المواتر فخامه
وأنا على بيجو كثيرٍ بلاويه
غرمان عبدالله البكري
يا زول كبوتكم مفتوح
والبيجو اليوم خرباني
لاعاد ماهي تجي واتروح
دوّر على موترن ثاني
عبدالكريم عبدالرحمن السلوم - القرائن
مسكين ياللي نازلٍ وسط المكينه
يبحث عن العله ولاهوب لاقيها
الموتر تعطل والسايق حاله حزينه
يفحص بلا دبره والفكر حايرٍ فيها
لا تفحص الموتر بالثياب المتينه
الوكاد إن الصيانه منت راعيها
عبدالرحمن أحمد الكنهل - الرياض