صوت الصورة

يا راعي الهلي ترى الصيد عداك
الصيد روح مع هبوب تسوقه
خذلك على الكبوت غفوه وحذراك
لا يفوتك اللي زين الريش طوقه
عبدالله الرفيعي
- القصيم
الموتر اللي وقف في فيئة الشجره
وراعيه نايم يبا قسطن من الراحه
مرتاح وآمن لكنه ما لبس غتره
واليوم بعض العرب للسر بواحه
غازي بن قاعد العتيبي - الدوادمي
نوم الدقيقة من بعد كد وتعب
له لذةٍ محداً عرف مذاقها
ولاهب نسناس الهوا من وين هب
اطرب على صوت الشجر واوراقها
سعد عبدالله المقابلة - الخرج
مريح البال عن الصحبه والازعاج
وعن هموم النفس تشري الراحه
تحت الظلال لا هاج الهوا هاج
وهبت نسايم الغربي ووصوفه
أحمد بن عبدالرحمن أبانمي - الرياض
الطير مخلوق له الحق ويعيش
وليا بغت ترتاح جا من رصدها
في عجة البارود هملول من ريش
اقفت عن الطلحه تناقص عددها
سعد الحماد -
روضة سدير
ما لقاها إلاّ انت ظل.. وبراد.. ونومه
ما بها كهرب.. ولا يزعجك عقاري
من يبيع الارض نشريه بأعلى سومه
والله ان غبارها مثل نهراً جاري
لطيفة محمد العبدالرحمن
وش بلاك يا راعي الهلي
راقد على الموتر وتارك الاصحاب
الهلي مهب لك لكن قلي
ليه تاخذه وانت على وجهك حجاب
حسين خالد الشدي - الدلم
الطلح كلٍ يبي ظله
حتى المواتر واهلهنه
ومحداً يبا الحر لا بالله
خصٍ ليا صار بالكنه
صالح بن عبدالعزيز الجلعود
مابه ربيع وصيد وأخذت غفوه
في ظل طلحة فوق كبوت موترك
احرص على الماء واطلب الرب عفوه
اسمع كلام اللي يودك وحذرك
فهد بن عقيل الطويان
- بريدة
نايم على الكبوت تحت الظلالي
نومة قرير العين ماهوب خواف
أمن وأمان من عزيز الجلالي
نأمن ولا نخشى سروق وحواف
سليمان عبدالعزيز السنيدي
- الرياض
تبور السلع لولا اختلاف الأذواق
كلٍ على مزاجه يتم اختياره
أحداً يختار من الملذات مالاق
واحداً نومه على كبوت سياره
محمد سعد القحطاني - الرياض
اليوم ضاع وصافي الوقت منحاس
فراغ ويسوي سوايا عظيمه
ووجه كثر وصايبه نعس وعماس
وياكم شاهدنا مناظر أليمه
حمد عبدالله الوايلي - حوطة سدير
يا زين نومي على الكبوت
يا حلوها وقت ظهريه
والقنص دايم علي ما يفوت
يزين لي وسط بريه
ريان محمد الخنيفر - الرياض
الظل نافع لكل الناس
يا ليت يدري كل حطابي
اخاف ضربةٍ بالفاس
أو تشحن بصندوق قلابي
عبدالكريم عبدالرحمن السلوم - القرائن
صورة العدد بعدسة الزميل إبراهيم الجبر
نستقبل مشاركاتكم الشعرية على الفاكس (4871070) أو الايميل الخاص صفحة الخزامى:
RB-khozama@alriyadh.com
زاوية (صوت الصورة) ونرحب بالصور الهادفة والطريفة.. ويا هلا.