صوت الصورة

شف السنين الممحلات الهزايل
يوم انحنت بام الرطب وعوجتها
كانت عدال وتحتها السيل سايل
وكم واحداً جوعان ذاق ثمرتها
لو جيتها بالصيف وعز القوايل
ترتاح لاحطيت جنبك تحتها
محمد عفار المطيري- عنيزة
بعض النخيل اليوم تلقاه مهجور
راحو اهله واليوم محداً يواليه
واصبح مقرفيه جاهل ومغرور
وشفنا العبث بالنار ينهي تواليه
يابن جبر ما شفته اليوم مخطور
اقول غرس اجدادنا ما نخليه
محمد بن عبدالعزيز الخنيفر
- أشيقر
سبحان من يحيي هشيم وفاني
عقب الخضار وزينت الحمل فيها
الباسقات الشامخات المجاني
اسنين تبقى والبشر تهتويها
اثمارها من يوم عهد السواني
والحمد الله يومنا مدفيها
محمد عبدلله المحلي
- حوطه بني تميم
يا ذا النخل لاباس لاباس لا باس
ثلاث مرات على ساق اواسيك
هذي جذوعك تالي الوقت يباس
ماتت معاويدك وماتت سواقيك
معاد فكربك كثير من الناس
الله يجازي ناس ما تعتني فيك
هذال بن سعيدان العصيمي
- الرياض
منول يا ورق فوقي تنوحين
واطرب معك ياورق حزت مسيان
واليوم بوحي بزرق الدمع ياعين
وقت مضى شبان واليوم شيبان
ويا نخلتين قرب حوضي تغنين
لاتطربن لابد دورات الأزمان
حجاب بن فرج القحطاني
- الرياض
لا والله النخله غدت صيد لإهمال
وزال الصبر منها وخرت صريعه
من عقب ماهي للعطا مضرب أمثال
ومن عقب ماهو مجدها فالطليعه
تنحت وصارت تراث للأجيال
ومنظر جمالي للخطوط السريعه
حمد بن مطلع الشلاحي- الرياض
يانخلة العرجون ليتك بقيتي
هذا الزمن يانخل مايرحم الحال
راحت اليالي غامضه وأنحنيتي
من البطايا يانخل مال الغصن مال
نفل محمد الصخيري الدوسري
الشايب اللي مات له عام
لحقه بعد مدن نخيله
قام يتثني موت وهيام
ماله ظليل إلا ظليله
على حياته كانوا قيام
وساعة رحل عافوا بديله
فارس الثبيتي - الطائف
هذا يموت وذاك تبرى حياته
واضحه للعين من لقطة الصوره
إنحنى العرجون واوحي بناته
زيرن الإنتاج من مشروره
مواطن البيتين يكثر خيراته
وباسقات النخل بالخير مذكوره
سعود عائش التميمي الحربي
أم الجرايد جرايد ها على القاعه
والرأس في الارض وطول الوقت جايبها
ماكنها عاشت الأيام من ساعه
وفلاحها قال: قل الماء سبايبها
الله يسقي وطنها ويسقي إزراعه
آمين يارب يامنشئ سحايبها
شجعان سعود المقاطي- الرياض
عقب الحياء والطول مال النخل مال
وكن النخل ساجد لربه وباريه
مات النخل خاوي والاحوال بأحوال
ماعاد به ناس على البير تسقيه
ولإبن سرور أذكر له البيت لاقال
رزقي على اللي ميت القشع يحييه
سعود بن سعد الحافي- الرياض
نخله لجذعه رد راسه عطشها
في محكم التنزيل هالوصف مذكور
إم التمر بالموت تعلن طفشها
من فقد عود غاب ماجاه بقصور
عقب السعه والريح لاعب إشوشها
اليوم حدوها على الضيق بالدور
فهد بن عقيل الطويان
- بريدة
معروف ذا فعل اليالي والايام
يجهل بها اللي دالهن ماعرفها
دنيا ابنادم كلها لهو اوهام
ولا راحت الايام صعب خلفها
مرت بنا ايام وراحت كما احلام
لكن وش سجل بداخل صحفها
غنام مسعود الحويل القريني
- نعام
يا الباسقه كم جني منك الرطب وأطيب إتمور
وكم سنين قضيتها وياكم عليتي
وأصبحتي اليوم مثل القوس ديكور ديكور
بعد التعالي على باقي الشجر أنحنيتي
ياغارق في هوى النفس اعتبر واترك الجور
من قبل ياتيك يوم تترك أهل وبيتي