يا عيني اللي نومها ما تطيعه

يا عيني اللي نومها ما تطيعه
تسهرك ياجفني ولا تستشيرك
القلب وسطه هاجسن ذب ريعه
وانا ما قول الا عسى الله يجيرك
ياوقت مانرضى الجفا والقطيعه
لو غيرنا يحسب قليلك كثيرك
نقدم الواجب بما نستطيعه
فأيامنا اللي يا لبنادم تحيرك
عمرك قصير لو تحسب ربيعه
الموت حاصل لو يجيك بسريرك
وقتٍ يضيع به رضيع ورضيعه
والشايب اللي فالمجالس خبيرك
نفوسنا تبغى الصدور الوسيعه
اللي على الصكات تمشي بسيرك
سر الصحيب اليا وفا ما نذيعه
وان زل قلنا كثر الله خيرك
كلمة نعم ماهي بشريه وبيعه
تجيك يا الطيب ولحدن خشيرك
العمر يمشي والليالي سريعه
وانته يا بن ادم ما تعرف مصيرك
وتبي تعرف الطيب لاجا طبيعه
لا شلت فوق همومك هموم غيرك
هذال بن ضاوي العتيبي