خل المحل اللي يخاصمك راعيه

خل المحل اللي يخاصمك راعيه
ارفع مقامك واتركه لا تمره
ما حدك الله في محله تلاغيه
ما دام خيره ما عدل نصف شره
ماهو مجازي حضرتك لو تجازيه
يجازي احسانك بكيد ومضره
لو يضحك حجاجه تبين مواريه
يعني ترا ماهي علامة مسره
اهرج بكلمة حق ويبين خافيه
ويعطيك كل اللي بقلبه يصره
مدري على ويش اجبرنه هقاويه
هذا وله ما ضاع مثقال ذره
لكن سليم العقل رايه يقديه
واكثر تفاهات الزمن ما تغره
عزيز نفس ولا تغير مباديه
جوده وطيبه ما اختلف عن مقره
عز وذخر للي من الناس ناصيه
في مرحبا صوته لضيفه يجره
الطيب ما جابه من السوق شاريه
من الله وميل الدهر ما يفره
والنعم كلمه حازها من مساعيه
وتقال له في برد وقته وحره
وحنا نقول الله من الخير يغنيه
ونقول باعلى الصوت لله دره