صوت الصورة

وقت الوسم لاحت علينا بروقه
وتفقد الصقار في حالة الطير
عجل مشى قبل النهار وشروقه
يحسب حساب الوقت لا يكون تأخير
والطير فوق الكف أطلق سبوقه
وحوّل على جولٍ دماها تناثير
عبدالله بن عبود السهلي -تبوك
اكفخ ترى من ايديه اسبوقك افلات
رفرف على خربٍ من الصيد ميلاف
رقيت لك طعسٍ من السافي أوقات
أبي على مد البصر صيدك يشاف
سالم معزي الفهيقي - تيماء
يا صقر مثلك شف الابطال والحور
من عصر أبو زيد الهلالي وجساس
لكن شكلك ضايق الصدر مقهور
ودك تحلّق بالفضا دون محباس
ما ندري القرناس بالحيل مجبور
حبك تمكن قلب مغليك والراس
علي جابر الفيفي - بيشة
الرجل اظنه يقنص بكل الاوقات
عساه ما يقضي على العيد كله
لاسامعٍ غيره ولاشاف نشرات
ومن كثّر الروحات بيجيب فله
اما غزال يجيب ولا حبارات
ولا طويل العمر يعرف محله
غنام مسعود القريني - نعام
وقت الهدد راح يامسكين
والكل يحرص على طيره
طيرك صغيرن يبي تمرين
يا ليت تنهج على الديره
عبدالكريم عبدالرحمن السلوم - القرائن
إن كان تبغى تسلي الطير لا باس
ولا الهدد توك على موسم الصيد
القيض يتعب بالفعل كل قرناس
لو هو نشيط ومن كفوفه عباريد
سعود بن عبدالعزيز الهزاع - نعام
طير الهدد هدّه ترى الوقت مسموح
بأرض القنص هدّه يصيد الحباري
والصقر من صقاره اليوم ممدوح
لابد للمقناص جيب السفاري
عبد المحسن محمد المحيسني - رياض الخبراء
انا بافك حرّن من على صاف الشهد مضيوم
لعلّه ينهض ويرجع يجيبله سمان الصيد
وخذ مني وصية يوم تفتل فالسماء وتحوم
لك الله لو معي جنحان مرجع للوطا واعيد
محمد زايد الروقي - الجمش
أمسك سبوق الطير لا يرتفع فوق
الطير من يقدر يجيبه إلى طار
يا قام يبرم بالسما تقل معلوق
يبي الفضا الواسع ولا يشوف صقار
عقلا خزن- تبوك
الحرّ صغير يبي تمرين
يبي له أيام معدوده
ما ينطح الخرب يالغالين
أيام ثم يثبت وجوده
محمد بن عبدالعزيز الخنيفر - أشيقر
صورة العدد
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
من الصور النادرة والطريفة