رجال الأمن

إرجال الأمن وقفاتهم ترفع الراس
أهل الوفا والتضحية والبطولة
رباطهم في موقف العز نوماس
اللي يريد الزعزعة مامهوله
تقديرهم بقلوبنا ماله قياس
يملك جميع القلب عرضه وطوله
أعني جميع اللي على الأمن حرّاس
اللي يحرسون الوطن وأخلصوله
كسبوا نعم كسبوا محبة ونبراس
كسبوا مقامات الفخر والرجولة
يجب لهم كل التعاون من الناس
أقول هذا ثم أقوله وأقوله
وطن بليا أمن ما فيه أنفاس
الأمن هو روح الحياة بحلوله
ما نرخصه لهل المحايل والأنجاس
الأمن غالي ما ستتب بسهولة
بالنار صاروا مثل بُن بمحماس
يوم اشعلوها واللعين أذعنوله
يبي يموت الشر ويعدي الباس
ويبقى الشموخ بقوة الله وحوله
يبقى شموخ بلادنا نبض الإحساس
للأمتين ودولته خير دولة
دولة آل سعود ساس على ساس
أهل كتاب الله وسنة رسوله
عبدالله غالب الحربي
القصيم