وقفات قلم

الشمس فوق وكل عودٍ له اضلال
وفالليل ضل العود عن ضل غابه
ولولا ارتفاع الشي وش فرق الاشكال
بين الهلال وبين قوس الربابه
والعزم ما يكفي لحاله عن المال
والجو لولا الريح برّك سحابه
ومن خذ عبر يمناه مليون فنجال
خسران لاخذ في يساره كتابه
واللي بيهزم بالذهب صدق الامثال
وحطه سلاح وجهزه بالاجابه
كم من سلاحٍ بسببه وخذ رجال
ناسٍ تصيد الفيل من شان نابه
والسيف يرحم نوب والطرف قتال
وجرح الحوادث غير جرح الصبابه
وما للسفر متعه ولو كنت خيال
لا صار ميدانك عيون الرقابه
واللي ورا الجدران يهوا أشهب اللال
معذور واجمل شي فالسجن بابه
وان كان معني الموت في راحة البال
على حياة الشخص دلّك عذابه
وليا تكلم صاحب الفلسفه قال
أصابعك جيران والا قرابه
واتعس زياره تتعب القلب والحال
من غاب بالواقع ثم الحلم جابه
ومن يخلص النيه قبل يبدا الاعمال
أجره عظيم ودعوته مستجابه
خالد البقمي