فوز الرياض لكم مكانة وتقدير

من الفرحه اللي داخلي يمكن أطير
واحل ما بين الجسر والرصافه
واحاكي ابن الجهم والتل والبير
ما بيني وبين القصايد كلافه
هذا حدث يسوى وهذا خبر غير
تباشروا يا أهل الصحف والصحافه
فوز الرياض لكم مكانه وتقدير
مجد سطع كل سمع به وشافه
بين العرب ما يوصل القمه صغير
امن الجبل لين المحيط وضفافه
مكانة المانح وصدق المعايير
وحضوره الرسمي وطيب الضيافه
اضفت ثقه دون احتمال أي تقصير
وافضت عن انصاف يليق انتصافه
بعض الجوايز تستحق التباشير
ولا بعضها ما عليها حسافه
يالعاصمة باسمك دلالة وتعبير
تبقى على طول الزمن واختلافه
أبين من جبال الابانات والنير
والين من النسمه لاجات بلطافه
سلام يا قصر الحكم قصر وأمير
أمير يسكن كل قلب وشغافه
ابو فهد غيث الفقارى المعاسير
رمز الشجاعه والكرم والعرافه
بفكاره الخلابه وحزمه يصير
المستحيل اللي بحكم الخرافه
يا ريس التحرير ما احتاج تبرير
كل على قولي يسوق اعترافه
المركز الأول هذا لك ولا ضير
وتنافس الباقين لجل الوصافه
اسطورة تصغر بجنبك الأساطير
بينك وبين منافسينك مسافه
قال الملك جعل الله يرده بخير
تراك يا تركي ملك للصحافة