صوت الصورة

يا حوار ماحدّك على مبرك الضيق
الا انت شايف من عنى الوقت شوفه
الونش شال امك على فكة الريق
للسوق والجلاب مابه مروفه
فهد بن عقيل الطويان - بريدة
ماحلا الحوار اللي يدور لمه
في جنب هالددسن وزان اماته
راعيه مستانس وعينه يمه
ويدرج الزينات من نوقاته
فراج بن محمد القرقاح
الحوار مولود له يومين
وعنده عراوي وقفٍ جنبه
مغتر وبارك على الرجلين
وحيد منطول وش ذنبه
سعود بن عبدالعزيز الهزاع - نعام
الشمس نار والبهايم ضعيفه
وقعيد تعبان متروك بالشمس
حوله سباع هالكه ثم مخيفه
وين الضماير لاهلها كود تحتس
محمد بن عبدالعزيز الخنيفر - أشيقر
يالهيلكس لا تدهسينه وتمشين
وشيليه من قيض الشمس بالغماره
عند المكيف تكسب الاجر ضعفين
لا تتركه يا صاح وسط الحراره
علي آل زولان الفيفي
حاسب على المفرود لا لا توطاه
تراه من تحت الكفر ما تشوفه
الحر هده والعطش قصر خطاه
وعلى التذري اجبرنه ظروفه
خالد بن ناصر المخيمر - روضة سدير
يا راعي الددسن عليك الهون
بالهون لا تدعس الحاشي
بحب الحوير انا مفتون
هذا نمونه على الماشي
عبدالكريم عبدالرحمن السلوم - القرائن
العطش والجوع واهمال خطير
والبهايم له مكانه.. واهتمام
واضح تعبان تركه ما يصير
وفعلكم هذا ترى فيه الملام
ريان محمد الخنيفر - الرياض
انتبه يا راعي الموتر لا ترجع وراء
الحذر واجب ويشكر من قلبه نبيه
الحوار اجويع والبرد حده لذراء
كان ماله أم يا سعيد ذا ظير عليه
خالد محمد الخرفاني - الخرج
الحوير باركن جنب العجل
من لواهيب الحر في ذيك الصحارى
صورة حلوة.. ولا يمكن تمل
في وضوح الشمس قبل الغداري
بشائر القحطاني - الرياض
صورة العدد الماضي
نستقبل مشاركاتكم الوطنية على صورة العدد
بمناسبة الاحتفال باليوم الوطني
حتى مساء الاثنين على الفاكس رقم : 4871070
أو الايميل الخاص بصفحة الخزامى:
RB-khozama@alriyadh.com
زاوية (صوت الصورة)
ونرحب بالصور الهادفة والطريفة .. ويا هلا