يا رب جعله في جنانك مبشر

قصيدة رثاء في الفقيد محمد بن عوض بن مروي المطيري تغمده الله بواسع رحمته وأسكنه فسيح جناته..
مرحوم يا راس(ن) بالأمجاد يذكر
عساك بالجنة جوار النبيين
عساك مع خير المخاليق تحشر
ويجمعك بأحبابك فجناته.. آمين
منا خذاك الموت فالليل الأقشر
غصب علينا حل ما بيننا البين
لاعدت ياليل عن الموت كشر
اقبل يحث خطاه في ليل الاثنين
ضاق الفضا.. وضلوع صدري تكسر
والكون اظلم في وجيه القريبين
عم الحزن والدمع حولك تنثر
واشتد كرب اللي حوالك محيطين
والموت يقرب مني أكثر وأكثر
في ليلة فيها غدا الليل ليلين
كتمت حزن منه قلبي تفطر
الموت هذا الموت وتشوفه العين
حان الرحيل.. ولا بقى ما يصبر
هم بقلبي مثل طعن السكاكين
ما قول غير الله للذنب يغفر
ويفرج لمن همه سطى بالشرايين
والا الشعر تعجز بيوته تعبر
والله ما يكفي لو اكتب دواوين
يا بوي.. فغيابك على العيش ما اقدر
ما عاد يسوى الكون.. والجرح جرحين
ما دام راح اللي به الكل يفخر
شيخ لفعل الطيب خاض الميادين
من صغر سنه بالجزيلات يشهر
منصا لربعه عز.. عوق المعادين
كل ما انتخوا به منهم ما تعذر
حر شهر بالطيب طلق الحجاجين
جامع صفات فالرياجيل تندر
يشهد له القاصين قبل الموالين
له هيبة منها الشجعين تحذر
والصدق والمعروف طبع وعناوين
سيرة حياته بالجزالة تعطر
عزيز عاش ومات.. جزل المضامين
دون الوطن ما يوم والله تأخر
بحاله وماله ما يحسب فالاثنين
عشق وولاء فاجيال يغرس ويبذر
لاخوان نوره.. خادمين الشريفين
لا جل الملك والدين يبذل ويسهر
ما هو حكي.. علم عليه البراهين
والحمد لله كل شيء (ن) مقدر
قضيت عمرك يا فخرنا على الزين
عزاي فيك.. اللي رأيته يبشر
بأنك من أهل الخير والموقف الزين
يا رب جعله في جنانك مبشر
ويالله تلطف في عباد مساكين
ويا بو محمد.. وسط قلبي تسمر
قيمة رجال ساعة الضيق وافين
بالذات.. يا منهو عن الطيب شمر
لك وقفة نستني ان الدهر شين
والا الكسر والله ما ينتجبر
كسر(ن) عظيم ما جبره المداويين
ماله دوا يا عاذلي لا تكثر
أمر قضى ما فيه شيء (ن) يعزين
عبدالهادي بن محمد بن عوض المطيري