صوت الصورة

طفلٍ صغير ومنظر الزين شاقه
قرم ملا له طاسةٍ منه ما عاق
أبيض.. برد هملول من ضرع ناقه
ما هو تجاري معلب وسط الاسواق
سعد الحماد
اغبق يا طفل وانهض بالغضاره
من حليب إبكار دراً مسمناتي
الحليب الصحي نمره واستماره
أفضل .. وأحسن من حليب الشافطاتي
عبدالرحمن بن منصور التركي - البكيرية
يا صغير احذر حليب البل
العود ما يحتمل شربه
من يشربه يقفي ويقبل
يا ويل من يا قف بدربه
فهد بن عقيل الطويان - بريدة
على فرشته ويلد عينه لما عونه
صغيراً ما يعرف اللي جرى حوله
الا يا عرب شاقني حليبٍ تحلبونه
خليطه من النوار مع نبتت الشوله
حمد عبدالله الوايلي - حوطة سدير
يا راعي الخلفات والطاس مليان
خل البطاطس عنك وأشرب من الطاس
فيه الفوايد كلها أشكال وألوان
وصية الرسول تشفي من الباس
عبدالله بن عاتق الغرابي - رياض الخبراء
أشرب حليب النوق
به عافيه ربي
فيه الدواء مسيوق
من شطرها صبي
حمود النافع
على شرب الصبوح اليوم أنا يا ربعنا مشتاق
أحب البر وشوف العشب ولا لي يالربع غيره
أنا لا ربعت دار الفخر تلفي العرب عشاق
لفتها من ديار بعاد من ديره ليا ديره
محمد بن عبدالعزيز الخنيفر - أشيقر
يا الطفل قل لبوك هذا حليبي
ما هو حليبٍ مجفف بالقواطي
باب أنا رجال ما نيب بيبي
الأندومي ما أبغاه وقرش البطاطي
محمد عبيد العنزي - رفحاء
قدامك الطاسة وتضحك ومبسوط
ودك تذوق وخايف انه يضرك
اشرب حليب النوق لاصار محطوط
واحذر تذوق البودره لاتغرك
خالد بن ناصر المخيمر - روضة سدير
نستقبل مشاركاتكم الشعرية
على الفاكس 4871070
أو الأيميل الخاص بصفحة الخزامى:
br-kozama@alryadh.con
زاوية (صوت الصورة)
ونرحب بالصور الهادفة والطريفة.. ويا هلا.