عسى السلامة دوم لك درع ولباس

ارحب ياسلطان السعد شامخ الراس
جيتك غيثٍ مثل غيث المخايل
رجعت وانباج الرجا واظلم الياس
وعيّد بشوفتك الوفا والجمايل
ياللي حوى كل المكارم بلا قياس
في سيرةٍ تفخر بطيب الفعايل
خصايلك لو وزعوها على الناس
وفت وكلٍ صار وافي خصايل
للحرب ضرغامٍ .. وللطيب نبراس
وللجود مزن .. وللعطايا همايل
في غيبتك ننشد والارياق يباس
وندعي لك الله في فروض ونفايل
وجيت وفرحنا مثل ما فرح بدباس
عودٍ من فراقه جروحه علايل
عسى السلامه دوم لك درع والباس
من كل سوٍ ياعريب السلايل
ياذخر قايدنا راع العزم والباس
اللي تطوع صطوته كل عايل
وانتم لنا حكام ساسٍ على ساس
حكمٍ موثقته سيوف صقايل
من قبلكم والوضع في نجد منحاس
نهبٍ وسلب وحرب بين القبايل
حتى حكمتو وانجلت كل الاتعاس
وساد العدل بعد الفتن والقتايل
خليل بن ذيب بن هدلان