صوت الصورة

يا سائق السيكل ترى البيض محمول
وإن زل بالملي رحله خطيره
بالك تسرع وانت بالعون مسؤول
والله يستر من عواقب مسيره
فريح بشير العنزي - حائل
يالعامل اللي تشيل حمول
افتح عيونك وناظر زين
أخاف من واحدن مجهول
يصدمك وتصبح وضع شين
ماجد السهلي - الرياض
صديق صدقني ترى البيض منكوب
ليا هزه السيكل تكسر كباره
صحيح ما قدر على العبد مكتوب
لكن قل لي كيف تجمع كساره
عقاب بن سقيان العتيبي - الجمش
عز الله اللي ضاع شغلك بلاشي
يا واسراً في سيكله شحنه البيض
اما غدرك الدرب وراحت طشاشي
ولا حداك الوقت في لاهلاب القيض
سعد الحماد - روضة سدير
صديق قلي ويش ناوي على البيض
عساك موجه يم بعض المطاعم
الحمد لله وقتنا ما هو القيض
كان الخساره واضحه وأنت فاهم
خالد بن ناصر المخيمر - روضة سدير
الأجنبي كثر علي ذا السيكل العمله
وفي ازدحام الشارع مصمم يعيش
البيض جا به وباعه بيعة الجمله
وزوّد عليها يطلب ريال بخشيش
ناصر الأسمري - بللسمر
باللهون ياللِّي تسحب البيض بالهون
لو كان لي ما تفعله غير واضح
شوفي تناقص صار من دون في دون
من سبَّة الليِّ غاب باسلوب فاضح
فهد بن عقيل الطويان - بريدة
يا مستصعب أمور وشايل حملها خل العامل لك مثال
ما خاف طيح البيض دام رتب أطباقه باحترافيه
رتب ساس أمورك لكن بالهون على نفسك يا طيب الفال
وساير زمانك وغدره وتعامل معه بطريقه سياسيه
محمد بن شعلان التميمي - الرياض
الهند والنيبال والغرب والصين
صاروا مثل لإصدار زين الصناعه
ليا شفت واحدهم ضعيف ومسكين
مار الهدف خلاه رمز الشجاعه
فهد البلان
سكر فمك واكرب يدينك على طول
وأحذر تزل المقوده من يسارك
وان طاح حظك طاح وتصير معلول
اغنم حياتك لا تضيع مسارك
محمد بن فهد الجلعود - سميراء
رفيق من وين جبت البيض
شراء وإلا جاك ببلاشي
الظاهر أنه خرب بالقيض
وتبي تبيعه على الماشي
زبن مقبل العنزي - بريدة
يا محمَّلن سيكلك بالبيض
وشلون تمشي وذا حملك
والله لوَّك بشمس القيض
كان انعدم صايرن مثلك
عبدالكريم عبدالرحمن السلوم - القرائن
يا الهندي منين جبت البيض
جبته وهو منتهي سوقه
تحرقه شمس القيض
وبالشتا تحت ابروقه
معيض مليح الغضوري - الرياض
بالبرد ما ينفع إلا البيض
واحد طبق ما يكفيكم
شرواك ما يطلب التمريض
والفلفل الحار يدفيكم
عبدالرحمن بن راشد التميمي - حائل
نرحب بمشاركاتكم الشعرية حتى مساء الاثنين على الفاكس رقم 4871070أو الإيميل الخاص بصفحة الخزامى: khozama@alriyadh.com
زاوية: (صوت الصورة).. ويا هلا