صوت الصورة

أقفى معه حملٍ خفيفٍ قشاشي
لاهل الحلال اللي على الدرب وصوه
يشيل من يشّر والكروه بلاشي
يبي اليا ركبوا على الحمل رصوه
سعد الحماد - روضة سدير
الوضع للركاب ما هو طبيعي
فوق الحطب مشكل وفيه الخطوره
وأنته على خطٍ طويل.. وسريعي
واضح من المنظر بشكلٍ وصوره
علي رشيد الرشيد - رياض الخبراء
حمّل ونيته ما لا يطاق
و الزود لا يفجر البندق
وليا مشى منظره ما لاق
ما لاق لو صار فالفندق
غازي قاعد العتيبي - الدوادمي
بالهون يا سايق الهايلكس
شلت العلف فوقه إثنيني
حذراك بنشر وكسره عكس
ثم تقلب يسار ويميني
وإلا إعترض لك غشيمٍ عكس
قلبه عمى مفتح العيني
فهد بن عقيل الطويان – بريدة
راعي الحطب تلقاه في كل ميدان
يسعّر على كيفه ولاحدن درا به
والمشتري من زود الأسعار حيران
السعر غالي يفتقد للرقابه
محمد عبد العزيز الخنيفر - أشيقر
حتى العمالة شاركة في حطبنا
صاروا على عينك يبيعون يشرون
وحنا على الونيت نمشي شطبنا
على النظام اللي نعرفه يقولون
حمد عبدا لله الوايل - حوطة سدير
ما ضاق ذا الموتر على شان تجلس
في الحوض فوق أغصان أشجار زينه
لو حدّكم واحد على البنص داعس
طرتوا مثل ريشٍ هله ناتفينه
سعود عبدالعزيز الهزاع - نعام
احطب على كيفك ولاحدن يردك
ذي عادةٍ في كل عام تحطبون
ليت برقابة توقفك عند حدك
وهذا هو الأخطار وأنتم تعرفون
ريان محمد الخنيفر - الرياض
يا شايل الشحنه على ظهر موترك
أرفق ترى دربك طويل المسافه
لو طاحوا الاثنين أو بنشر كفرك
زود الأسف ما يفيد وأيضاً الحسافه
خالد بن ناصر المخيمر - روضة سدير
الله يستر على اللي فوق
ومن الهوا لا يطحوني
إن كان سواقكم مطفوق
يا عزَّتي للمساكيني
عبدالكريم عبدالرحمن السلوم - القرائن
بالهون يا سايقه بالهون
ودعتهك الله على ممشاك
حذراك عن سرعة المجنون
واطلب من الله عسى يحماك
محمد بنفهد الجلعود - سميراء
يا اللي ركبت فوق الحمل لا تطيحون
منظر يذكرني في وقت ماضي
تبون لكم سواق يمشي على الهون
طفل الهيلكس يسرع والخط فاضي
عواد بن مطرود - حائل
نستقبل مشاركاتكم
على إيميل الخزامى:
rb-khozama@alriyadh.com
أو الفاكس رقم: 4871070
ونستقبل الصور الهادفة والطريفة
صورة العدد مبخرة الجنادرية