صوت الصورة

السيكل اللي شلته وشلت راعيه
هذا دليل إن الحوادث قليله
والموتر الخربان تفرح بطاريه
معذور ذا رزقك تجيه وتشيله
تشده بونشك وتسحب مواطيه
وراعيه حولكء خوف كسره وميله
فهد بن قيل الطويان - بريدة
هذا الزمن زمان العجايب
فيه السياكل شفتها فوق سطحات
مرحوم يا وقت المشي والركايب
ياليتهم لحقوا على ماضين فات
عبدالله بن عبدالرحمن المقبل
راعي السطحه في الخط فاضي
يبحث عن رزقه مع حاجة عياله
قانع بالمقسوم أو بالمكتوب راضي
صايراً السواق والموتر حلاله
عبدالرحمن الماجد - الرياض
أسمع كلامي يا ولد وان كان عندك علم هات
ياللي على ظهر الديّنا سادح لك بسكليت
هذه لك الله خصصت يا صاحبي للسيارات
وإلا السياكل ما عليها لو في حوض الونيت
فهد مطر المخلفي - قصر ابن عقيل
عساك تروح لا حادث ولا عطلان
يجير الله خلقه منك ويجيرك
صحيح إنك خدوم وتنقذ البلشان
ولا تصلح حياة الناس من غيرك
عقاب بن سقيان العتيبي - الجمش
دراجة اللي ركب مع راعي السطحه
قام يتلفت يخاف الجمس يرميها
تقابلوا صدفة وصدورهم شرحه
وكلن بدى السالفه للثاني يرويها
سعود بن عبدالعزيز الهزاع - نعام
وين أنت ياللي موترك خر للزيت
صابه عطال أو جاير الوقت مضنيه
خذ كسرة السيكل إذا رحت وإن جيت
مشور عليه وصامل العلم تشريه
عبدالكريم النغيمشي - الربيعية
صاحب السطحه لقاء سيكل وشاله
يوم دار ولا لقاء شيئاً يشيله
اللي ما عنه فائدة مالك وماله
بعض الحاجات شيلتها فشيله
زبن مقبل العنزي - بريدة
ما لقى له حملة على الطريق
غير راعي سيكل شاله بلاش
الحراره زايده مثل الحريق
والدينا ما لقى فيها معاش
عقلا خزن العنزي - تبوك
الونش حام وعاد بالبسكليته
لا يبتحل فالرزق باللوح مكتوب
باكر يعطيك من ليا نصيته
يرزقك مع سعي للارزاق مطلوب
سعود عائش الحربي - جدة
عادتك يا السيكل يبنشرك مسمار
ويبلش بك السواق والله يعينه
وعادة هل السطحات يغلون الاسعار
ليا حصلوك بعيد عن المدينه
عبدالله بن دواس - ساجر
امشغَّل السطحه على الخالي
والحموله كلّها سيكل البنغالي
ترزَّق الله ودوَّر الريالي
وأحرص على العيش وكسب الحلالي
عبدالكريم بن عبدالرحمن السلَّوم - القرائن
يا راعي السطحه علامك تكاسلت
عن شيلة الموتر تشيل السياكل
يا خوفي إنك للزبائن تجاهلت
تحرص على الراحه وقل المشاكل
خالد بن ناصر المخيمر - روضة سدير
راعي السطحه يدور من يشيله
شال سبيره والحقه سيكل رفيقه
الحوادث عندنا صارت قليله
من جهود مرورنا هذي حقيقه
محمد بن عبدالعزيز الخنيفر - أشيقر
يا راعي السطحه تراك أنت خسران
المال مالك والفوايد لغيرك
هذا غلام يكد والجيب عمران
حتى السياكل شالها ما يشيرك
حمد عبدالله الوايلي - حوطة سدير
نرحب بمشاركاتكم الشعرية حتى مساء الاثنين على الفاكس رقم 4871070أو الإيميل الخاص بصفحة الخزامى: khozama@alriyadh.com كما نرحب بما تلتقطه عدساتكم من صور نادرة..
زاوية: (صوت الصورة) ونأمل عدم استخدام الورق المسطر.. ويا هلا.