الصوم به عدة فوايد للانسان

ضيفٍ علينا حل يامرحبا به
ترحيبة تجلى عن القلب الأحزان
ضيفٍ نهليبه ونحسب حسابه
له بالقلوب البيض قدر وعنوان
شهر رمضان الله ذكر في كتابه
فيه أنزل القرآن والنور به بان
أوله رحمه كل مسلم درابه
ووسطه من رب السموات غفران
وآخره عتق من لهيب وعذابه
طالبك عفوك يوم روغات الأذهان
يوم السؤال ويوم وقت الاجابه
افتح لنا من يمة الخير بيبان
هذا وبلغنا رمضان وثوابه
يا الله يا المعبود يا عالي الشان
اقبل دعانا والخير يقتدابه
الصوم به عدة فوايد للإنسان
يا مسلمين الخير مفتوح بابه
صموا تصحوا وأكملوا خامس الاركان
هذي نصيحة خير عز ومهابه
والمسلمين اخوان وأقول يا أخوان
الادمي حذرا يضيع شبابه
ترى شباب الآدمي ما له أثمان
وانبه الغافل لا ينسى زهابه
من قدم الحسنى يجازى بالأحسان
وقراءة القرآن خير ورحابه
مع طاعة المعبود في كل الازمان
ومجاهدة الأنفس يبي له صلابه
ما هيب فتره تنهي كل الازمان
والموت له يوم ينوخ ركابه
والخاتمة من قلب وشعور ولسان
صلوا عدد ما لاح برق السحابه
على النبي الهاشمي نسل عدنان
صالح بن عبدالرحمن الناصر