يا.. شرقي الحسن

يا شرقي الحسن.. حسنك مملكة إغرا
يا كثر أساطيرها.. بأصغر تفاصيلك
مجنون.. كل القصيد اللي.. يبي يقرا
بعض التفاصيل.. والا يجيد ترتيلك
من مفرق الراس.. لين اصباعك الصغرا
ربي جعلك آية.. للزين في جيلك
طفل يسولف بصدري.. شافك.. وهذرا
ما عاد له بالكلام.. إلا تهاويلك
يا قيصر الغيد.. وإلا أقول.. يا كسرا
وألا حبيبي.. احب إني.. أنادي لك
مداين الشعر.. تخضع لك.. ولا تشرا
يا الفاتح.. اللي جمالك.. سيفك وخيلك
لك فاخر ألحانها.. يوم أقبلت.. تترا
آمر.. تدلل.. وكل الأرض تصغى لك
قصايد.. ما تجيلك طايعه.. قشرا
إن كان ما ترتوي.. وصفك.. وتدليلك
انهض حجاجك.. وشف كم صار لك أسرا
وأرخ الهدب.. تستلج الناس.. يا ويلك
اظلم.. ولا ترحم قلوب تبي تبرا
وليا جرحت الحشا.. ماني بشاكي لك
اعفر يدك في الضلوع.. و تبنت الصحرا
وإلك يتفتق.. ثمر قلبي.. ويدني لك
أنا من سنين.. لين الحين.. في مسرا
في ليل أخر مداه.. اقرب قناديلك
طولت هجر الغلى.. وابطيت بالبشرا
وانا احسب أني.. قريب من مواصيلك